Нұрсұлтан Назарбаев халықаралық әуежайында авиация саласындағы «Aviation Awards» марапаттау рәсімі өтті. Ол 2022 жылдан бері өткізіліп келеді. Бұл жолы елордалық әуежайдың серіктес компаниялары тоғыз номинация бойынша марапатталды.
«Марапаттау – бұл ынтымақтастық үшін және авиация саласын дамытуға қосқан үлесі үшін алғыс білдіру», – деп атап өтті елордалық әуежай басшысы Дәулет Хамзин. Оның айтуынша, сыйлықтың басты мақсаты – барлық қызметкерлер мен серіктестерді біріктіру.
Биыл QAZAQ AIR әуекомпаниясы елдің ең үздік өңірлік авиатасымалдаушысы атағын алды.
«Елордалық әуежай ұжымына біздің қызметімізге жоғары баға бергені үшін шын жүректен алғысымызды білдіреміз. Бұл марапат – компанияның әрбір қызметкерінің жеңісі. QAZAQ AIR әуе компаниясының бір ғана жолы бар – жыл сайын тиімдірек болу, жыл сайын жолаушыларға үздік қызмет көрсету. Дәл осы жолмен біз жаңа биіктерге ұмтыламыз», – деп атап өтті авиакомпания өкілдері.
Естеріңізге сала кетейік, QAZAQ AIR өткен жылы «Орталық Азия мен ТМД-ның үздік өңірлік авиакомпаниялары 2022» номинациясы бойынша үздік үштікке енді.